BMTning Giyohvand moddalar va jinoyatchilikka qarshi kurashish boshqarmasining (BMT GJB) Abu Dabi deklaratsiyasi dasturi doirasida 14-17 mart kunlari Tailandning Bangkok shahrida bo‘lib o‘tayotgan “Moliyaviy nazorat amalga oshiruvchi idoralar va korrupsiyaga qarshi kurashuvchi organlar bilan hamkorlikni kengaytirish"mavzusidagi seminarda Korrupsiyaga qarshi kurashish agentligi va Hisob palatasi masʼul xodimlari iborat O‘zbekiston delegatsiyasi ishtirok etmoqda.

Maʼlumot uchun: Abu Dabi deklaratsiyasi dasturi BMT GJB tomonidan BMTning Korrupsiyaga qarshi konvensiyasi hamda Barqaror rivojlanish maqsadlarining ijrosini taʼminlash uchun 2021-yilda ishga tushirilgan.

Unda korrupsiyaga qarshi kurashishda oliy audit organlarining rolini oshirish va ularning korrupsiyaga qarshi kurashish organlari bilan hamkorligini kuchaytirish vazifasi ham qamrab olingan.  

Seminarning vazifasi milliy, mintaqaviy va xalqaro darajada Moliyaviy nazorat amalga oshiruvchi idoralari hamda korrupsiyaga qarshi kurashish idoralari o‘rtasidagi muloqotni kuchaytirish, hamkorlikning yangi yo‘nalishlarini belgilashdan iborat.

Tadbir ushbu sohadagi eng yangi konsepsiya va so‘nggi amaliy ishlanmalarni ochiq formatda muhokama qilish uchun muhim platforma bo‘lib xizmat qiladi.  

Seminarda, shuningdek, Markaziy, G‘arbiy Osiyo va Tinch okeani mintaqasidagi 21 davlat (Indoneziya, Xitoy, Yaponiya, Malayziya, Tojikiston, Qirg‘iziston va boshqalar) vakillari ishtirok etmoqda.

Korrupsiyaga qarshi kurashish agentligi

Axborot xizmati