Korrupsiyaga qarshi kurashish virtual akademiyasi faoliyatini takomillashtirish masalalari muhokama qilindi

9-dekabr – Xalqaro korrupsiyaga qarshi kurash kuni munosabati bilan Korrupsiyaga qarshi kurashish agentligi va Huquqni muhofaza qilish akademiyasi rahbariyati o‘rtasida uchrashuv bo‘lib o‘tdi.

Uchrashuvda tomonlar Akademiya va Agentlik o‘rtasidagi amaldagi memorandum doirasida korrupsiyaga qarshi kurashish sohasidagi o‘zaro hamkorlikni yanada rivojlantirish, xususan, Korrupsiyaga qarshi kurashish virtual akademiyasi elektron platformasi faoliyatini takomillashtirish masalalarini muhokama qildi.

Virtual akademiya elektron platformasining bazaviy o‘quv kurslarida ayni vaqtga qadar 1 mln 67 ming nafar maktabgacha taʼlim tashkilotlari tarbiyalanuvchilari, 3 mln 146 ming nafar maktab o‘quvchilari, 62 275 nafar oliy taʼlim muassasalari talabalari o‘qitildi, 47 200 nafar davlat xizmatchilari esa maxsus o‘quv kurslarida taʼlim oldi.

Hozirda platformada nodavlat notijorat tashkilotlari uchun ham maxsus o‘quv kursi ishlab chiqilmoqda.

Uchrashuvda, shuningdek, Virtual akademiyaning yangilangan platformasini ishlab chiqish, kontentini sifat va mazmun jihatdan yanada boyitish bo‘yicha vazifalar belgilab olindi.

Platformaga sunʼiy intellekt imkoniyatlarini joriy etish hamda o‘quv dasturlariga yoshlarni kengroq jalb qilish masalalariga alohida eʼtibor qaratildi.

Muloqot mobaynida joriy oyda Qatarning Doha shahrida bo‘lib o‘tadigan BMTning Korrupsiyaga qarshi kurashish konvensiyasi ishtirokchi-davlatlarining 11- konferensiyasi (COSP11) doirasidagi tadbirlarda samarali ishtirok etish borasida ham o‘zaro fikr almashildi.

Korrupsiyaga qarshi kurashish agentligi

Axborot xizmati

608 110 For print

Korrupsiyaga qarshi kurashish Axborot xizmati 12.12.2025

• Copy link