Asaka tumanini korrupsiyadan xoli hududga aylantirishga oid kompleks dastur tasdiqlandi
Asaka tumanida zamonaviy yechimlar orqali korrupsiya va jinoyatchilikdan xoli hududga aylantirish, aholi orasida ularga qarshi murosasiz muhitni yaratish chora-tadbirlari bo‘yicha kompleks dastur tasdiqlandi.

Ushbu Dastur Davlat rahbari raisligida islohotlar natijadorligi, hududlarda ishlarning borishi, aholini o‘ylantirayotgan masalalarga yechim topish yuzasidan o‘tkazilgan videoselektor yig‘ilishida belgilab berilgan topshiriqlar ijrosini taʼminlash maqsadida Korrupsiyaga qarshi kurashish agentligi va boshqa mas‘ul tashkilotlar vakillaridan iborat Ishchi guruh tomonidan ishlab chiqilgan.

Asaka tumanida Agentlik direktori Akmal Burxanov, Ishchi guruh masullari hamda viloyatning tegishli idora va tashkilotlari rahbarlari ishtirokida o'tkazilgan yig'ilishda Dasturda belgilangan chora-tadbirlarni o'z vaqtida, sifatli va to'liq amalga oshirish masalalari muhokama qildi.

Dasturda quyidagi muhim chora-tadbirlar belgilangan:
▫️tumandagi barcha tashkilot va idoralar rahbarlarini rotatsiya qilish, lavozimga davlat xizmati va mehnat qonunchiligi talablariga muvofiq ochiq tanlov asosida munosib kadrlarni qo‘yish;
▫️korrupsiyaga oid jinoyat sodir etganligi uchun javobgarlikka tortilgan shaxslarni davlat xizmatiga qabul qilmaslik choralarini ko‘rish;
▫️tuman hokimligi huzurida NNT va OAV vakillari, faol fuqarolar va xotin-qizlar vakillaridan iborat tarkibda jamoatchilik kengashini tuzish;
▫️tuman hokimligining Jamoatchilik kengashi oldida hisobotlarini har chorakda eshitish amaliyotini yo‘lga qo‘yish;
▫️vazirlik va idoralaning tuman bo‘limlarida korrupsiyaviy holatlar haqida tunu-kun murojaat qilish imkoniyatiga ega aloqa kanallari, shu jumladan, ishonch telefoni, ijtimoiy tarmoqlardagi kanallarni ishga tushirish va qayta aloqa tizimini joriy etish;
▫️ korrupsiyaga duch kelgan holatlar bo‘yicha murojaat qilishga mo‘ljallangan “ishonch quti”larini xizmat ko‘rsatish binosining kirish qismlariga joylashtirish.


Shuningdek, Dasturda maktabgacha va maktab taʼlimi, sog‘liqni saqlash, elektr va gazdan foydalanish, savdo va xizmat ko‘rsatish sohalarida korrupsiyaning oldini olish, jamiyatda korrupsiyaga qarshi kurashish bo‘yicha murosasiz munosabatni shakllantirishga qaratilgan quyidagi tadbirlar o‘rin olgan:
▫️tumandagi 49 ta davlat maktabgacha taʼlim muassasalari tarbiyalanuvchilarini sog‘lom ovqatlantirish tizimini to‘liq autsorsing asosida tashkil qilish;
▫️maktabgacha taʼlim tashkilotlarida “Ota-onalar kengashi” yoki “Jamoatchilik kuzatuv guruhi”ni tashkil etish, bunda ular autsorsing xizmati sifatini baholash, shikoyat yoki takliflarni yig‘ish, hisobotlar yuritilishini monitoring qilishni amalga oshiradi;
▫️tarbiyalanuvchilar, o‘quvchilar va xodimlarning davomatini nazorat qiluvchi “Face-ID” qurilmalarini o‘rnatish va davomat haqida ota-onalarga “SMS” xabar berish tizimini yo‘lga qo‘yish;
▫️tuman tibbiyot birlashmasiga qarashli muassasalardagi hamshira va vrach lavozimlariga 0,25, 0,5 va 0,75 shtat birliklari asosida ishga qabul qilish amaliyotiga chek qo‘yish;
▫️tug‘uruq bo‘limlarida “suyunchi puli” va “kuzatish marosimi”ni to‘liq taqiqlashga qaratilgan normativ-tashkiliy choralar ko‘rish, muassasada zarur ogohlantiruv maʼlumotlarini joylashtirish;
▫️tibbiyot muassasalaridagi mavjud dori vositalari ro‘yxati va bo‘sh koykalar to‘g‘risidagi maʼlumotlarni yagona tibbiyot axborot tizimi orqali ko‘rib borish imkoniyatini yaratish;
▫️elektr va gaz tarmog‘iga noqonuniy ulanish holatlarini qog‘oz shaklidagi dalolatnomalarda rasmiylashtirishdan to‘liq voz kechish va noqonuniy ulanish holatlarini “E-dalolatnoma” axborot tizimiga to‘liq o‘tkazish choralarini ko‘rish;
▫️“Raqamli bozor” dasturini joriy etish orqali:
– bir martalik yig‘imlar va ko‘rsatilgan xizmatlar uchun to‘lovlarni inson omilisiz, shu jumladan onlayn “QR” kod bilan tasdiqlanadigan to‘lash tizimini barcha savdo nuqtalarida joriy etish;
▫️har bir mahallada “Tashabbusli byudjet” loyihasi doirasidagi loyihalar ustidan jamoatchilik nazoratini amalga oshirish maqsadida tashabbuskor guruhlarni shakllantirish.
Korrupsiyaga qarshi kurashish agentligi
Axborot xizmati