Virtual qabulxona

Jizzax viloyatida korrupsiya yuqori bo‘lgan sohalarda o‘rganishlar o‘tkazilmoqda

Asosiy yangiliklar 1 888 marta körilgan

Jizzax shahri, Sharof Rashidov, Bahmal, G‘allaorol tumanlarida sog‘liqni saqlash, maktabgacha va maktab taʼlimi, bandlik, bank, kadastr, qurilish sohalarida korrupsiyaning oldini olish choralari qay darajada samarali yo‘lga qo‘yilgan?

Bu borada Korrupsiyaga qarshi kurashish agentligi direktori o‘rinbosari Umed Mavlyanov va Respublika Ishchi guruh tomonidan o‘rganish olib borilmoqda.

Ishchi guruhning Milliy bank, Mikrokreditbank, Asakabank, Agrobank va Xalq bankining hududiy filiallaridagi o‘rganishlarida bank xizmatlari, xususan, imtiyozli kredit mablag‘lari ajratish jarayonida inson omilining ustuvorligi va raqamlashtirishning to‘liq joriy etilmagani korrupsiyaviy xavflarni oshirishi qayd etildi.

Jizzax shahridagi Kardiologiya markazi va akusherlik kompleksi, Sharof Rashidov tumanidagi 29-sonli oilaviy poliklinika va tug‘ruq kompleksi, G‘allaorol tumani tibbiyot birlashmasida o‘tkazilgan o‘rganishlarda qator kamchiliklar aniqlandi.

Pullik va bepul tibbiy xizmatlarning ochiq va adolatli taqsimlanmasligi, xodimlarni ishga qabul qilishda oshkoralikning yetishmasligi, davlat xaridlari va moliyaviy xarajatlar ustidan nazoratning sustligi shular jumlasidandir.

Kambag‘allikni qisqartirish va bandlik bo‘limlari tomonidan ochiq tanlovlarning yetarli darajada tashkil etilmagani hamda bo‘sh ish o‘rinlari haqidagi maʼlumotlar esa aholiga yetarli darajada yetkazilmayotgani maʼlum bo‘ldi.

Maktabgacha va maktab taʼlimi tizimida taʼlim-tarbiya jarayonida shaffoflik, byudjet mablag‘larining maqsadli sarflanishi, pedagoglarga munosib shart-sharoitlar yaratish va raqamli texnologiyalarni joriy etish kabi yo‘nalishlarda masʼuliyatsizlik va sustkashliklarga yo’l qo’yilgan.

Masʼullar bilan birga yuqorida qayd etilgan kamchiliklarni tezkor bartaraf etish hamda kelgusida yo‘l qo‘ymaslik yuzasidan zarur chora-tadbirlar belgilab olindi.

Korrupsiyaga qarshi kurashish agentligi
Axborot xizmati

Öxşaş materiallar