Ижтимоий тармоқларда Коррупцияга қарши курашиш агентлигига айни вақтга қадар давлат бюджетидан ажратилган маблағлар ва уларнинг сарфланганлик ҳолатига оид асоссиз ва нотўғри маълумотлар тарқалмоқда.

Мазкур масала бўйича қуйидагилар маълум қилинади:

Агентлик давлат органлари ва ташкилотлари фаолиятида очиқлик ва шаффофликни, жамоатчилик олдидаги ҳисобдорликни таъминлаш бўйича ўз ваколати доирасида барча зарурий чораларни амалга оширмоқда ва мазкур тамойилларга биринчи навбатда, ўз фаолиятида қатъий амал қилиб келмоқда. Хусусан, Агентликка давлат бюджетидан ажратилаётган маблағлар ва уларнинг сарфланиши, шунингдек, очиқ эълон қилиниши лозим бўлган бошқа маълумотлар расмий веб-сайт (anticorruption.uz)да кенг жамоатчилик учун очиқ эълон қилиб келинмоқда.

Жумладан, Агентликка республика бюджетидан ўтган давр (2020, 2021, 2022 ва 2023 йилнинг I чораги) мобайнида жами 51,6 млрд сўм миқдоридаги маблағ ажратилган.

Ушбу маблағларнинг жами 32,9 млрд сўми Агентлик ходимларининг ойлик маошига, 23,8 млн сўми коррупцияга қарши тадбирлар ўтказиш учун, 605,9 млн сўми эса Агентлик биносининг коммунал ва коммуникация харажатлари учун сарф қилинган. Бундан ташқари, автомашиналар сотиб олиш (Агентлик ташкил этилганда), эҳтиёт қисмлар ва ёнилғи мойлаш харажатлари учун 1 788,0 млн сўм, маҳаллий ва хорижий хизмат сафарлари харажатлари учун 616,2 млн сўм миқдоридаги маблағлар ажратилган.

Шу билан бирга, Агентлик матбуот котиби 22 миллион сўм миқдоридаги ойлик иш ҳақига эга эканлиги ҳақида тарқалган маълумот ҳам ҳақиқатга тўғри келмайди.

Ҳозирги вақтда матбуот котибининг ойлик иш ҳақи 13,5 млн сўм миқдорни ташкил этади.

Шуни ҳам таъкидлаш жоизки, Агентлик Ўзбекистон Республикаси Президентининг 2020 йил 29 июндаги 6013-сон Фармони билан ташкил этилган бўлиб, унга асосан Агентликнинг асосий вазифалари ва фаолият йўналишлари белгилаб берилган. Хусусан, Агентликка мамлакатда коррупция ҳолатини тизимли таҳлил қилишни таъминлаш, шунингдек, коррупцияга оид хавф-хатарлар юқори бўлган соҳалар ҳамда коррупцияга оид ҳуқуқбузарликлар содир этилишининг сабаб ва шарт-шароитларини аниқлаш ва бартараф этиш, коррупциянинг олдини олиш ва унга қарши курашиш соҳасидаги давлат сиёсатини, коррупцияга қарши курашиш чораларининг самарадорлигини оширишга қаратилган давлат ва бошқа дастурларни шакллантириш ва амалга ошириш каби вазифалар юклатилган.

Шу ўринда, коррупциявий жиноятларни содир этган шахсларни ушлаш борасида жиноят-процессуал қонунчилиги ва бошқа қонунчиликда белгиланган тартибда терговга қадар текширув ва тезкор қидирув тадбирларини ўтказиш Агентлик ваколатларига кирмайди.

Бироқ, Агентлик томонидан жисмоний ва юридик шахсларнинг мурожаатлари ҳамда масофавий мониторинг тадбирлари асосида коррупциявий ҳолатлар мунтазам ўрганилиб, тўпланган ҳужжатлар қонуний қарор қабул қилиш учун ҳуқуқни муҳофаза қилувчи органларга тақдим этиб борилмоқда.

Хусусан, айни вақтга қадар бюджет маблағларининг сарфланиши ва давлат дастурлари бажарилиши юзасидан Агентлик томонидан 100 дан ортиқ ўрганишлар ўтказилган бўлиб, улар натижасида аниқланган коррупция ҳолатлари юзасидан ҳуқуқни муҳофаза қилувчи органлар томонидан Жиноят кодексининг тегишли моддалари билан 91 та жиноят иши ва 107 та маъмурий ишлар қўзғатилган.

Жумладан, биргина давлат харидлари соҳасида ўтказилган ўрганишлар жараёнида жами 1 трлн 230 млрд сўмлик харидлар жараёнида йўл қўйилган қонунбузилиши ҳолатлари юзасидан ҳуқуқни муҳофаза қилувчи органларга 301 та сўровнома юборилган бўлиб, шундан қарийб 710 млрд сўмлик харидлар бўйича буюртмачиларга улар томонидан давлат харидлари бўйича берилган эълонларни бекор қилиш юзасидан жами 615 та тақдимнома киритилиб, бюджет маблағларининг мақсадсиз сарфланишининг (аффилланганлик, рақобатни чеклаш, манфаатлар тўқнашуви каби қонунбузилишлар) олди олинган.

Юқоридагиларга кўра, ахборот воситалари ва ижтимоий тармоқ каналларидан жамоатчиликка тўғри ва холис ахборот етказишни сўраймиз.

Коррупцияга қарши курашиш агентлиги

Ахборот хизмати

625 183 Босма версияси

Korrupsiyaga qarshi kurashish Axborot xizmati 02.06.2023

• Ҳаволадан нусха олиш