Коррупцияга қарши курашиш миллий кенгашининг тегишли қарорига асосан, Қорақалпоғистон Республикаси, вилоятлар ва Тошкент шаҳар коррупцияга қарши курашиш ҳудудий кенгашлари фаоллигини ошириш, жойларда коррупциянинг олдини олиш бўйича белгиланган вазифаларнинг ижросини таъминлаш мақсадида жорий йилнинг апрель-сентябрь ойлари давомида семинар машғулотлари ташкил этиш белгиланган. 

Семинарлар мавзуси турли йўналишларда бўлиб, ҳудудий кенгашларнинг таклифлари асосида шакллантирилди.

Бугун мазкур семинарларнинг дастлабкиси “Давлат органлари ва ташкилотлари, шу жумладан, маҳаллий ижро этувчи ҳокимият органларида коррупцияга қарши курашиш бўйича чора-тадбирларнинг самарадорлиги рейтинг баҳолаш натижалари” мавзусида ташкил этилди.

Таъкидланганидек, жорий йилда Давлат органлари ва ташкилотлари, шу жумладан, маҳаллий ижро этувчи ҳокимият органларида коррупцияга қарши курашиш бўйича чора-тадбирларнинг самарадорлиги рейтинг баҳолаш ишлари илк марта республика миқёсида ташкил этилди.

Маълумот учун: Ўзбекистон Республикаси Президентининг 2022 йил 12 январдаги ПҚ-81-сон қарорига кўра, баҳолаш 29 та махсус индикаторлар асосида “E-Anticor.uz” электрон платформаси орқали амалга оширилади.

Мазкур рейтингда давлат ташкилотларида коррупцияга қарши курашиш бўйича механизм ва ҳуқуқий асосларнинг амалиётга татбиқ этилганлиги, коррупциявий хавф-хатарларни камайтирилганлиги, давлат ташкилотлари раҳбарларининг коррупцияга қарши муросасиз муносабати, ходимларнинг коррупцияга қарши курашишга оид ички тартиблардан хабардорлиги, аҳолини ушбу иллатга нисбатан муросасиз муносабатини шакллантиришга қаратилган тарғибот тадбирларининг самарадорлиги баҳоланади.

Тадбир давомида баҳолаш натижаларига кўра ҳудудлар кўрсатган натижаларга эътибор қаратилди.

Қайд этилганидек, ҳудудлар миқёсида “Яхши” кўрсаткичини ҳеч қайси ҳудуд эгалламади. Бухоро, Наманган, Тошкент шаҳри, Сирдарё, Самарқанд, Тошкент, Жиззах, Фарғона вилоятлари “Қониқарли” натижани кўрсатди. Хоразм, Навоий, Қорақалпоғистон Республикаси Вазирлар Кенгаши, Қашқадарё, Андижон, Сурҳондарё вилоятлари эса “Қониқарсиз” баҳо олди.

Ҳудудларда коррупцияга оид ислоҳотларни бирдек таъминланишига масъул сифатида Коррупцияга қарши курашиш ҳудудий кенгашларига мазкур натижаларни келтириб чиқарган сабаблар ҳақида тушунтиришлар берилди.

Шунингдек, мазкур натижаларни таҳлил қилиш ва ҳудудий кенгашлар йиғилишларида мунтазам муҳокама қилиб бориши, рейтинг натижаларини яхшилаш бўйича масъулларга тегишли таклиф ва топшириқларни бериб бориш лозимлиги билдирилди.

Семинар якунида ҳудудий кенгаш аъзолари ўзларини қизиқтирган саволларга жавоблар олишди.

544 162 Босма версияси

Korrupsiyaga qarshi kurashish Axborot xizmati 20.04.2023

• Ҳаволадан нусха олиш