Қорақалпоғистон Республикасида коррупцияга қарши курашиш борасида амалга оширилаётган ишлар ҳолати ўрганилмоқда

Қорақалпоғистон Республикасида коррупцияга қарши курашиш борасида амалга оширилаётган ишлар ҳолати ўрганилмоқда

Коррупцияга қарши курашиш агентлиги директори Акмал Бурханов бошчилигидаги Ишчи гуруҳ Қорақалпоғистон Республикасида коррупция ҳолатини тизимли таҳлил қилиш, шунингдек, коррупция хавфи юқори бўлган соҳалар ҳамда коррупцияга оид ҳуқуқбузарликлар содир этилишининг сабаб ва шарт-шароитларини аниқлаш юзасидан ўрганишлар ўтказмоқда.

Ишчи гуруҳ томонидан дастлаб «Ҳудудиелектртармоқлари» АЖ Қорақалпоғистон ҳудудий филиалида давлат раҳбарининг ПҚ-57-сон қарорига мувофиқ амалга оширилаётган “Яшил энергия” дастури доирасида бюджет маблағларининг сарфланиши кўриб чиқилди.

Бу борада, шунингдек, қуёш панеллари ўрнатилган ижтимоий объектлар, хусусан, Қ.Ажинияз номидаги Нукус давлат педогогика институти, Навоий тоғ-кон металлургия университети ҳузуридаги Нукус давлат институтида қайта тикланувчи энергия манбаларини кенг жорий этиш, энергия самарадорлигини ошириш орқали энергия тақчиллиги қопланишини таъминлашга оид ишлар билан танишилди.

Ўрганишлар мобайнида Республика шошилинч тиббий ёрдам илмий маркази Қорақалпоғистон филиали фаолияти мисолида соғлиқни сақлаш соҳасида "Коррупциясиз соҳа" лойиҳасининг ижроси бўйича олиб борилаётган ишлар ҳолати ҳам ўрганилиб, тиббий хизматлар кўрсатишда коррупция ва бюрократиянинг олдини олиш, шаффофликни таъминлаш ва самарали тизим яратиш юзасидан тавсиялар берилди.

Коррупцияга қарши курашиш агентлиги

Ахборот хизмати

280 19 Босма версияси